দৃষ্টিহীন স্বামী আৰু ৰোগীয়া পত্নীৰ কাষত প্ৰশাসনিক বিষয়া আৰু কেইগৰাকীমান শুভাকাংক্ষী
![](https://www.kazirangalive.in/wp-content/uploads/2020/05/Screenshot_20200510-215321-1024x576.png)
নিউজ ডেস্ক, কাজিৰঙা লাইভ, ১০ মেঃ পুৰণা মামৰে ধৰা টিনৰে কোনোমতে এফাল চালি আৰু বেৰা দিয়া জুপুৰি সদৃশ এটি গৃহতে জীৱন নিৰ্বাহ কৰিছে দুৰ্ভগীয়া দুজনীয়া পৰিয়ালে এটাই । এয়া কলিয়াবৰৰ শিলঘাটৰ সমীপৱৰ্তী ৰবৰবাৰীৰ জীয়া কাহিনী । অসম সমবায় মৰাপাট কলৰ এগৰাকী প্ৰাক্তন শ্ৰমিক গোপাল দে’ আৰু তেওঁৰ পত্নীয়ে ২০০৮ চনৰ পৰাই এনেদৰে বাস কৰি আহিছে এই জুপুৰিটোত । পাহাৰৰ নামনিত জীৱন অতিবাহিত কৰা দৃষ্টিহীন স্বামী গোপাল দে’ আৰু দুৰাৰোগ্য ৰোগত আক্ৰান্ত পত্নী কালীমণি দে’ দুয়ো শয্যাগত। বিচনা বুলিবলৈ একোৱেই নাই স্বামী-স্ত্ৰী দুয়োৰে । অসম সমবায় মৰাপাট কলৰ অৱসৰপ্ৰাপ্ত শ্ৰমিক গোপাল দে’-এ লাভ কৰা মাহিলী পেঞ্চন ১০০০/- টকাৰে জীৱন যুদ্ধৰ সংগ্ৰাম খন দীৰ্ঘদিন ধৰি চলাই আছে যদিও কোনো দিনে ভাগৰুৱা হোৱা নাই গোপাল দে’ । স্থানীয় এগৰাকী হৃদয়বান লোকে গোপাল দে’ক প্ৰতি মাহে বেংকলৈ নি পেঞ্চনৰ ধন উলিয়াই দি সহায় কৰি অহাত দুবেলা-দুমুঠি খাই জীয়াই আছে স্বামী-স্ত্ৰী দুয়ো । চৰকাৰৰ কোনো উন্নয়ণমূলক আঁচনিয়ে ঢুকি নোপোৱা দুৰ্ভগীয়া পৰিয়ালটোৰ জীৱনলৈ লক্ ডাউনৰ এই সময় চোৱাতে আশাৰ বতৰা কঢ়িয়াই আনিলে নগাঁও জিলাৰ অতিৰিক্ত উপায়ুক্ত তথা কলিয়াবৰৰ ভাৰপ্ৰাপ্ত মহকুমাধিপতি বিতোপন নেওগে । অসম সমবায় মৰাপাট কলৰ উপ-সভাপতি তথা স্থানীয় সমাজকৰ্মী পলাশ বৰাক লগত লৈ মহকুমাধিপতি বিতোপন নেওগ হঠাতে উপস্থিত হ’ল অশীতিপৰ এই হাল দম্পতিৰ বাসস্থানত । প্ৰতিশ্ৰুতি দিলে দুয়োৰে বাবে এটা বাসগৃহ নিৰ্মাণ কৰি উপহাৰ দিয়াৰ কথা।
কথা মতে কাম। অসম সমবায় মৰাপাট কলৰ উপ-সভাপতি তথা স্থানীয় সমাজকৰ্মী পলাশ বৰা সহ কেইবাগৰাকী শুভাকাংক্ষীৰ সহযোগত মহকুমাধিপতি বিতোপন নেওগৰ তত্বাৱধানত এতিয়া বাসগৃহটিৰ নিৰ্মাণ কাৰ্য আৰম্ভ হৈছে ৷ দুৰ্ভগীয়া দম্পতিৰ তিনি পুত্ৰসন্তান থকাৰ পিছতো ৰোগীয়া পিতৃ-মাতৃৰ যতন লবলৈ আহৰি নাই তিনি সন্তানৰ । তথাপিতো আক্ষেপ নাই নিজ সন্তানৰ প্ৰতি । শেহতীয়াকৈ মহকুমাধিপতি গৰাকীৰ এনে প্ৰচেষ্টাই এতিয়া হাঁহি বিৰিঙাইছে দুৰ্ভগীয়া পৰিয়ালটোৰ মুখত ।