পৰম্পৰাগত মুখাশিল্পৰ কৰ্মশালা
নিউজ ডেস্ক, কাজিৰঙা লাইভ, ৭ জুলাই: পৰম্পৰাগত মুখাশিল্পৰ জ্ঞান আৰু কৌশলসমূহৰ সংৰক্ষণ আৰু নৱপ্ৰজন্মৰ শিল্পীসকলৰ মাজত ইয়াৰ প্ৰসাৰ ঘটোৱাৰ উদ্দেশ্যৰে আয়োজন কৰা হৈছে পৰম্পৰাগত মুখাশিল্পৰ কৰ্মশালা৷ ভিজুৱেল আৰ্ট একাডেমীৰ উদ্যোগত অহা ১৯ জুলাইৰ পৰা ২৪ জুলাইলৈকে ছয় দিনীয়া কাৰ্যসূচীৰে বোকাখাত জাতীয় বিদ্যালয়ত এই কৰ্মশালাৰ আয়োজন কৰা হৈছে৷ একাডেমীৰ সম্পাদক পাপু ঘোষে জানিব দিয়া মতে, অসমৰ ঐতিহ্যবাহী লোকদৃশ্য কলাৰ অন্যতম মুখাশিল্প নিৰ্মাণৰ এই কৰ্মশালাত প্ৰশিক্ষণ প্ৰদান কৰিব মাজুলীৰ চামগুৰি সত্ৰৰ মুখাশিল্পী চিচিআৰটি ফেলশ্বিপ প্ৰাপক দিব্যজ্যোতি গোস্বামী আৰু দৃশ্যকলা বিষয়ৰ স্নাতক বিজয় কৃষ্ণ হাজৰিকাই। কৰ্মশালাত মুখা নিৰ্মাণৰ প্ৰত্যক্ষ প্ৰদৰ্শন, সম্পৰ্কীয় কথোপকথন আৰু মৌলিক মুখা নিৰ্মাণৰ প্ৰক্ৰিয়া এই কৰ্মশালাৰ মুখ্য আকৰ্ষণ হ’ব বুলি উল্লেখ কৰি ঘোষে কয় কৰ্মশালাখনিত এঘাৰ বছৰৰ উৰ্দ্ধৰ সকলো ইচ্ছুক প্ৰশিক্ষাৰ্থীয়ে অংশগ্ৰহণ কৰিব পাৰিব৷ উদ্যোক্তা সকলে জনায় যে আসনৰ সংখ্যা সীমিত৷ তদুপৰি, অংশগ্ৰহণৰ বাবে বোকাখাতৰ লগতে অন্যান্য অঞ্চলৰ পৰাও প্ৰশিক্ষাৰ্থীয়ে আগতীয়াকৈ পঞ্জীয়নৰ বাবে যোগাযোগ কৰিছে৷ সেয়ে ইচ্ছুক সকলক আগতীয়াকৈ 8638096967 অথবা 9954356346 নম্বৰত যোগাযোগ কৰিবলৈ আহ্বান জনাইছে উদ্যোক্তাই৷
